Herrane Per Jørgensen, Audun Kleive og Jon Balke dannar sagnomsuste Jøkleba, og mange hugsar kanskje at dei vart årets overrasking og gledeleg gjensyn då dei etter mange år i dvale slo til som erstattar for opningskonserten 2011. Presse og publikum var euforiske og tanken på å høyra dei i fri luft med den mektige vossanaturen som bakteppe burde lokka dei fleste opp av sofaen laurdag i palmehelga.
Tradisjonen tru er dette Vossa Jazz si gåve til publikum og er såleis nok ein gong gratis. Opp mot femti utøvarar innan ulike greiner ekstremsport vert med: fallskjermhopparar, hanggliderar, paraglidarar og speedflyerar. Balke & co står på bakken og kommuniserer med utøvarane – dei kjem til å følgja det som skjer i lufta. ”Målet er å skapa ein heilskap av det som skjer i lufta og på bakken” seier Balke på synfaring. Så då er det berre å kryssa fingrane for at vêrgudane likar jazz!
Jon Balke – piano
Per Jørgensen – trompet
Audun Kleive – trommer
Asle Karstad – Lyd
Peder Istad – iskunst
Even Rokne m.fl. – ekstremsport
