– «Lundeng er en levende folketone!», (avisa Nordlys)
Med virtuost felespel og eit uttrykksfullt scenisk nærvær kjem Susanne Lundeng tilbake til Voss. Denne gongen som soloartist. Med seg i bagasjen har ho den nordnorske folkesjela.
Lundeng sitt musikalske språk spring ut frå den nordnorske ur-rytmen si pulserande tre-takt, og hennar eigne skapande røyst. Ho løftar fram spennet mellom folketone og samtid — det gamle og det nye — og balanserer kraft og varleik når dei sanselege tekstane hennar vert vovne inn i tonane.
Lundeng har i meir enn 30 år samla, formidla og vidareutvikla folkemusikk frå Nordland, og er i dag rekna som ein av dei fremste ekspertane på nordnorsk felespel og folkedans.
Under denne konserten i Kapellankåken kan ein i selskap av Lundeng og fela hennar ana Nordlandskysten sine vindar som for ei stund bles over Vangen.
