Bjørn Kjellemyr, ein av norsk jazz sine mest markante bassistar gjekk bort etter lengre tids sjukdom 9. august, 74 år gamal.
Bjørn Kjellemyr blei født i Bamble i Telemark 4. desember, 1950. Gjennom ungdomstida var han aktiv i rockemiljøet i Skiensområdet, før han gjekk meir og meir inn i jazzen. Gjennom livet bidrog Kjellemyr til eit breidt spekter av norsk jazz.
Han var blant anna bassist på Knut Riisnæs sitt Flukt (1982), som vann Spellemannprisen, i Terje Rypdal sitt nye band The Chasers, saman med Audun Kleive, som mellom anna ga ut Chaser (ECM 1985) og Blue (1987).
Samarbeidslista hans er lang og sjangeroverskridande: Jon Balke, Jon Eberson, Jan Gunnar Hoff, Bugge Wesseltoft, Søyr, Jazzpunkensemblet, Oslo 13, Berit Opheim og Nils Økland i BNB-trioen.
Han sette like djupe avtrykk i norsk visetradisjon, med Geirr Lystrup, Halvdan Sivertsen, Lars Klevstrand, Kari Bremnes, Anne Grete Preus og Jan Eggum. Og i samarbeid med barokkluttenisten Rolf Lislevand var han med på å skape ein hybrid mellom tidlegmusikk og improvisasjon, dokumentert på ECM-utgjevingar som Nuove Musiche (2006) og Diminuito (2009).
Internasjonalt fekk han høve til å spele med namn som Chet Baker, Joe Henderson og Pat Metheny, for å nemne nokre.
Frå 2005 var han førsteamanuensis i jazz ved Norges musikkhøgskole. Og i desse dagane ser vi mange av dagens profilerte norske jazzmusikarar minnast og takkar han som ein viktig rettleiar og inspirasjon. Han har inspirert fleire generasjonar bassistar.
Kjellemyr vart kåra til Årets Jazzmusiker av Foreningen Norske Jazzmusikere i 1990 og fekk Buddy-prisen i 1994 – den høgaste utmerkinga i norsk jazz.
Bjørn Kjellemyr etterlèt seg eit musikalsk livsverk som har sett merke i store delar av norsk musikkhistorie dei siste femti åra, men blir også hugsa som ein open, raus og omtenksam kollega og ven. Den djupe, varme tonen kling framleis.
Torkjell Hovland
