Vossa Jazz fortset med den kunstnarlege satsinga i 2011. I år går ressursane til fleire spenstige konsertar, eigenproduksjonar og fleire tingingsverk.
Sjølvaste tingingsverket, med det fjonge namnet «Voss», er det den framifrå trompetisten Matihas Eick som står for.
I tillegg er det satsa på to tingingsverk til samt to bestillingar. Badnajazzen sitt «Eg e liten eg, men eg vaoga meg»-prosjekt, med både live framføring og CD-utgjeving med same namn har allereie rukke å verta kjent lokalt. Grunna stor interesse rundt Tingingsverket til Badnajazz set Vossa Jazz opp ekstrakonsert sundag 17. april i Vossasalen.
Også ungdomen har fått sitt eige verk med «Lydbank». Jonas Vedde Ødegård er leiar for Vossa Jazz si ungdomssatsing UNGjaJAZZja som i år har investert i lydopptakarar som ungdommane har hatt på omgang og teke opp musikk som blir sett saman til eit samla verk av komponist Åsmund Weltzien.
Ekstremjazzen og Karl Seglem tek i bruk det nye kulturhuset med pyrokonsert på taket i produksjonen «Jazzeld». I samarbeid med Midtnorsk Jazzsenter er Vossa Jazz med på det nye oppdragsverket til Trondheim Jazzorkester.
God auke i billettinntektene for Vossa Jazz 2010
Styret i Vossa jazz vedtok på siste styremøte rekneskapen for 2010. Den syner eit positivt overskot på 80 000 kr og dette resultatet stadfestar at den økonomiske styringa på festivalen held stø kurs til liks med dei siste åra.
– Billettsalet i 2010 auka med 250 000 kr, medan sponsormidlane gjekk ned med tilsvarande beløp. Til trass for at me håpar sponsorane vil koma sterkare att, så er dette gode tal for oss, med tanke på at det ein festival aller helst vil er jo å selja billettar, seier styreleiar Magne J. Kalstad.
– Førehandssalet ligg godt an. Dette er sjølvsagt betryggande og gjer at me føler oss sikre på at folk likar programmet for 2011, tilføyer festivalleiar Trude Storheim.
